Mäin Numm ass Thierry Heles, an dat hei ass meng Spillplaz.
Daagsiwwer sinn ech ee fräischaffende Journalist deen sech op Valorisatioun a Wëssenstransfer op Héichschoule spezialiséiert huet. Wann dat dech intresséiert, fënns de mech op LinkedIn oder du kanns meng Artikelen doriwwer op TheNextLeap.is liesen.
Dëse Blog schreiwen ech aus Spaass. Et ginn hei vill Gedichter, e puer Kuerzgeschichten, Gedanken iwwert mäi Liewen, an och ëfters Linken zu interessanten Artikelen, Musek, an anerem Geschier, dat mer um Internet iwwert de Wee leeft.
Et ginn hei keng Reklammen oder gesponsert Artikelen. Dorunner hunn ech guer keen Interessi. Wann s de gären hei mat lies, géing et mech freeën, wann s de ee Link mat denge Kolleegen deels.
Dee Blog hei gëtt et mëttlerweil schonn zanter 20 Joer. Ech sinn nämlech vill méi al, wéi ech mech fillen. Dat heescht och, dass vill vu menge fréieren Artikelen hei net onbedéngt méi deem entspriechen, wéi ech haut iwwert d’Welt denken — liest al Saachen also mat Virsiicht.
De Logo gouf vu menger Fra entworf. D’Jenna akzeptéiert momentan och nei Clienten.
Um Spaweck
Ech kucke gäre Filmer. Wann et dir och sou geet, fënns de mech op Letterboxd.
Ech liesen säit Kuerzem endlech nees méi. Du fënns meng Bicher hei an der Bibliotéik, awer och op Storygraph.
Vu soziale Medien benotzen ech just Mastodon regelméisseg. Du fënns mech hei.
Kolophon
D’Titelen sinn meeschten am Cakewalk Schrëftzuch vun Tropical Type. Den Haapttext ass am Sfizia Schrëftzuch vun Atipo Foundry. Aner Schrëftzich si vu Google Fonts, an si änneren ëfters, an ech schreiwen se net ëmmer heihinner.
De Blog schreiwen ech normalerweis zu Cardiff, der Haaptstad vu Cymru.
Den Hosting ass vun All-Inkl an Däitschland, an engem Datenzenter deen 100% erneierbarer Energie benotzt (aus Waasserkraaftwierker déi vum TÜV Süd zertifizéiert sinn). Ech sinn säit iwwer 10 Joer zefridde mat hierem Service a kann se wierkech weideremfeelen.